കവിതയെഴുതുമ്പോള്
ശ്രദ്ധിയ്ക്കേണ്ടകാര്യങ്ങള്
പണ്ട് മലയാളം മാഷ് പഠിപ്പിച്ച വാക്യഘടനയെ
ഒരു കാരണവശാലും ഓര്ക്കരുത്.
എല്ലാവരികളിലും
ഓരോ അക്ഷരത്തെറ്റെങ്കിലും ഉണ്ടായിരിയ്ക്കണം
വാക്കുകള് ഇഷ്ടംപോലെ കറുകുറെ
കൊത്തിയരിയഞ്ഞു വരിമുറിയ്ക്കണം.
വൃത്തവും താളവും
ശകുനം വരാതെ നോക്കണം.
പ്രണയം പച്ചതൊടാതെ അരച്ചുകൂട്ടി
മുട്ടിനു മുട്ടിനു പൊതിയണം
പാദാദിപ്പൊരുത്തങ്ങള്
മഷിനോട്ടത്തില് പോലും
ദൃഷ്ടിയില്പ്പെടരുത്.
മുറ്റുവിനയോ പറ്റുവിനയോ
സകര്മ്മകമോ അകര്മ്മകമോ
വിഭക്തിയോ ഭക്തിയോ പാടില്ല.
വാക്കുകളെ ലിംഗവര്ണ്ണ ഭേദമില്ലാതെ
ഭ്രാന്ത ജല്പ്പനം പോലെ
വാരിയെറിയണം.
കഴിയുമെങ്കില് പച്ചത്തെറി മേമ്പൊടിചേര്ത്തു വേണം
(കാ, പൂ, മൈ ഇവയില്ത്തുടങ്ങുന്ന തെറി തന്നെവേണം)
എഴുതിത്തുടങ്ങേണ്ടത്
മൈലേജു കൂടിക്കിട്ടും.
മുന്കാല കവികളുടെ
പേരും നാളും പറഞ്ഞു
പോഴത്തം നിവേദിയ്ക്കണം.
തലക്കെട്ടില് ജനനേന്ദ്രിയങ്ങളുടെ
പര്യായങ്ങള് അഭിലഷണീയം
ലൈക്കോ കമന്റോ തരാത്ത വായനക്കാരെ
ഇന്ഷ്യല് ചോദിച്ചു ചൊടിപ്പിയ്ക്കാം
വേണമെങ്കില് ബ്ലോക്കും ചെയ്യാം.
പ്രത്യേക ശ്രദ്ധയ്ക്ക്:
വിശപ്പിനെക്കുറിച്ചോ
സാമൂഹ്യ തിന്മയെക്കുറിച്ചോ
ഒരക്ഷരം മിണ്ടിപ്പോകരുത്.
=============================== CNKumar.