പെരുക്കപ്പട്ടിക
റേഷന്‍ കടയില്‍ നിന്നും
നീണ്ടു വരുന്ന
പെരുക്കപ്പട്ടിക പോല്‍
എന്നിലൂടെ വളര്‍ന്നു,
നിന്നിലേയ്ക്കും
കുഞ്ഞുങ്ങളിലേയ്ക്കും
ഊളിയിട്ടിറങ്ങുന്ന
അരിപ്പുഴുക്കള്‍,
എന്നുമുതല്‍ക്കാണ്
ജീവിതത്തെ
രേഖയ്ക്കടിയിലേയ്ക്ക്
തള്ളിയിട്ടത്‌?
ഇലത്തുമ്പില്‍
ബലിക്കറുക വച്ച്
പടിയിറങ്ങിപ്പോയത്
സ്വപ്നങ്ങളല്ലേ?
അവരെന്താണിപ്പോഴും
നനഞ്ഞനെറ്റിയിലെ
ഭസ്മക്കുറി പോല്‍
വെളുക്കെചിരിച്ചു
തീണ്ടാപ്പാടകലെ നിന്ന്
മോഹിപ്പിയ്ക്കുന്നത്?
ഈ തീരത്ത്‌
തോണിയടുപ്പിക്കാതെ
മറുകരയ്ക്ക്‌
പോവതെങ്ങനെ?
ഇപ്പോള്‍
എല്ലാം
കുറിച്ചുവെയ്ക്കുന്ന
റേഷന്‍ കാര്‍ഡു
മണ്ണെണ്ണ നനഞ്ഞിട്ടില്ല,
നാമിപ്പോഴും
ഒരേ വരിയില്‍
കാത്തിരിയ്ക്കുന്ന
അക്ഷരം പോലെ
മുന്നോട്ടു നീങ്ങാനാവാതെ
എത്രനാള്‍?
അവര്‍ പറഞ്ഞതല്ലേ
ഉച്ചയൂണിനു മുമ്പേ
വരുമെന്ന്.......
ഇപ്പോള്‍
ഏകാദശി നോറ്റപോലെ
നീയും ഞാനും കുട്ടികളും.
=====================CNKumar
No comments:
Post a Comment