Saturday, May 21, 2011

കൂട്

  കൂട്
 
ഏതു സായാഹ്ന കാഴ്ചയിലാണ്
നിന്റെ മിഴികള്‍ നിറഞ്ഞത്‌?
തിരകള്‍ തലതല്ലുന്ന
തീരം വിജനമായതും
ഇരുട്ടിന്‍ കൈപിടിച്ച് 
തിരിഞ്ഞു നടക്കുമ്പോള്‍ 
ദൂരെ ഒരു മണ്‍ചെരാത്‌
കണ്‍ചിമ്മാതെ
നമ്മെ നോക്കുന്നതും 
ഏതു ഘടികാരദൃശ്യത്തിലാണ്
അവര്‍ തെരഞ്ഞത്‌.
വേനല്‍ മഴയ്ക്ക്‌
കാത്തിരിക്കാതെ
ഉറവ തേടിപ്പോയ കിളികള്‍
ജന്മഗേഹം ഉപേക്ഷിച്ചതാവുമോ?
ഉണങ്ങിയ ഒലിവുചില്ലകള്‍ക്കൊപ്പം 
വലയിപ്പെട്ടതാകുമോ? 
പക്ഷെ നീ മാത്രം;
നനഞ്ഞ കണ്ണുകളില്‍
കരിവിളക്കു തെളിച്ചു കാത്തിരിക്കുന്നു
വര്‍ത്തമാനത്തിലും.
ഇനിയൊരിക്കലും
മടങ്ങുമെന്നുറപ്പില്ലാത്ത
ഇണക്കിളി കൂടണഞ്ഞെങ്കില്‍,
നിദ്രക്കു മുമ്പേയുള്ള
പിന്‍കിനാവില്‍ കൂട്ടിവായിക്കാന്‍
ഓര്‍മ്മപ്പുസ്തകം തുറന്നു
അക്ഷര വടിവുകള്‍
തൊട്ടറിഞ്ഞു
തലോടി
അങ്ങനെ...
അങ്ങനെ.....
മെല്ലെ മെല്ലെ..
==========================സി എന്‍ കുമാര്‍
 
 
 

No comments: